రష్యాలో బయటపడ్డ 4000 ఏళ్ళ నాటి 'హిందూ' నగరం!
స్వస్తిక్ ఆకారంలో ఉన్న ఆ నగరం ఎవరిది? - ఆర్యుల జన్మస్థానం పై సంచలన నిజాలు!
4000-year-old Aryan city discovered in Russia
చరిత్ర అనేది పుస్తకాలలో దాగి ఉన్న పాఠాలు మాత్రమే కాదు... త్రవ్వేకొద్దీ బయటపడే అనంతమైన సత్యమది. సనాతన ధర్మం, లేదా హిందూ సంస్కృతి, కేవలం భారత ఉపఖండానికి మాత్రమే పరిమితం అని అనుకోవడం, మన పూర్వీకులు కాశీ నుండి కన్యాకుమారి వరకు మాత్రమే నడిచారని అనుకోవడం మూర్ఖత్వమే..
భారతదేశానికి వేల కిలోమీటర్ల దూరంలో... మంచుతో కప్పబడిన రష్యా దేశంలో... దాదాపు 4000 సంవత్సరాల క్రితం, ఒక నగరం ఉండేది. ఆ నగరం సామాన్యమైనది కాదు. ఆకాశం నుండి చూస్తే అది ఒక బ్రహ్మాండమైన చక్రంలా, లేదా ఒక యంత్రంలా కనిపిస్తుంది.
అక్కడ త్రవ్వకాలు జరిపిన శాస్త్రవేత్తలకు ఏం దొరికాయో తెలుసా? భారీ శివలింగాలా? కాదు. విగ్రహాలా? కాదు. అక్కడ దొరికింది... అగ్ని హోమ గుండాలు! అవును, మనం పెళ్లిళ్లలో, యాగాలలో వాడే అగ్ని గుండాలు. అక్కడ దొరికిన కుండల మీద 'స్వస్తిక్' గుర్తులు ఉన్నాయి. వాళ్ళు చనిపోయిన వారిని ఖననం చేసే పద్ధతి మన ఋగ్వేదంలో చెప్పబడిన పద్ధతిని పోలి ఉంది.
అదే... అర్కైమ్ (Arkaim). రష్యాలోని 'స్టోన్హెంజ్' అని పిలవబడే ఈ నగరం, మన ఆర్యుల చరిత్రకూ, మన వేదాలకూ సజీవ సాక్ష్యమా? అసలు ఆర్యులు రష్యా నుండి భారత్కు వచ్చారా? లేక భారత్ నుండే అక్కడికి వెళ్లారా? వంటి విషయాలు తెలుసుకోవడానికి ఈ రోజు మనం టైమ్ ట్రావెల్ చేయాల్సిందే, 4000 ఏళ్ళు వెనక్కి వెళ్ళాల్సిందే!"
వీడియోను చివరిదాకా చూసి మీ అభిప్రాయాలను కామెంట్స్ ద్వారా తెలియజేస్తారని ఆశిస్తున్నాను..
[ ఈ వ్యాసాన్ని వీడియోగా చూడండి: https://youtu.be/Y4aEThKOukg ]
ఈ కథ మొదలైంది 1987లో. అప్పటి సోవియట్ యూనియన్ (USSR) ప్రభుత్వం, దక్షిణ ఉరల్ పర్వతాల దగ్గర ఒక పెద్ద డ్యామ్ కట్టాలని నిర్ణయించింది. ఆ ప్రాజెక్ట్ కోసం ఆ ప్రాంతం మొత్తాన్ని నీటిలో ముంచేయాలి. కానీ నియమాల ప్రకారం, డ్యామ్ కట్టే ముందు పురావస్తు శాఖ వారు అక్కడ ఏమైనా చారిత్రక ఆధారాలు ఉన్నాయేమో చూడాలి.
అలా వెళ్ళిన పురావస్తు శాస్త్రవేత్తలకు అక్కడ కనిపించింది రాళ్ళు రప్పలు కాదు. ఒక అద్భుతమైన వృత్తాకారపు నిర్మాణం (Circular Structure). మొదట వాళ్ళు అదేదో చిన్న కోట అని అనుకున్నారు. కానీ త్రవ్వేకొద్దీ వారి కళ్ళు బైర్లు కమ్మాయి. అక్కడ బయటపడింది ఒక ప్రణాళికాబద్ధమైన నగరం. డ్యామ్ కడితే ఆ చరిత్ర మొత్తం నీటి పాలవుతుందని అర్థమై, శాస్త్రవేత్తలు ప్రభుత్వాన్ని ఎదిరించి, ఆ ప్రదేశాన్ని కాపాడారు. అదే అర్కైమ్.
కార్బన్ డేటింగ్ చేస్తే... అది సామాన్య శక పూర్వం 2000 ఏళ్ల నాటిదని తేలింది. అంటే ఇప్పటికి సుమారు 4000 ఏళ్ళ పై మాటే. అది సింధు నాగరికత (Indus Valley Civilization) చివరి దశలో ఉన్న సమయం.
ఆ నగర నిర్మాణం చూసి మోడ్రన్ ఇంజనీర్లు కూడా ఆశ్చర్యపోయారు. మన ఊళ్ళలాగా చదరంగా లేదు. గుండ్రంగా ఉండి, రెండు పెద్ద రక్షణ గోడలు (Defensive Walls) ఉన్నాయి. బయట ఒక గోడ, లోపల మరో గోడ. మధ్యలో ఖాళీ స్థలం. ఇళ్ళు ఆ గోడలకు ఆనుకుని, కేంద్రం వైపు చూస్తున్నట్లు ఉంటాయి.
పై నుండి చూస్తే అది సరిగ్గా ఒక 'మండలం' (Mandala) లాగా ఉంటుంది. కొంతమంది దానిని 'స్వస్తిక్ సిటీ' అని కూడా పిలుస్తారు. కారణం, దాని ముఖద్వారాలూ, వీధులూ, స్వస్తిక్ ఆకారంలో డిజైన్ చేయబడ్డాయి. సంస్కృతంలో 'స్వస్తిక్' అంటే 'శుభం' లేదా 'మంచి జరగడం' అని అర్థం.
ఈ నిర్మాణం కేవలం నివాసం కోసం కాదు.. ఇది ఒక ఖగోళ వేధశాల (Astronomical Observatory) లాగా కూడా పనిచేసింది. సూర్య చంద్రుల కదలికలను బట్టి వారు కాలమానాన్ని లెక్కించేవారు. ఇది మన ప్రాచీన భారతీయ జ్యోతిషశాస్త్రానికి దగ్గరగా ఉండటం యాదృచ్ఛికమా?
ఇక అర్కైమ్ ప్రజలు ఎవరిని పూజించేవారు? అక్కడ గుడులు లేవు, విగ్రహాలు లేవు. కానీ ప్రతి ఇంట్లోనూ ఒక బావి (Well) మరియు ఒక అగ్ని గుండం (Fire Altar) ఉంది.
ఇక్కడ మనం గమనించాల్సింది, ప్రపంచంలో అగ్నిని దైవంగా భావించి పూజించే సంస్కృతులు చాలా తక్కువ. అందులో ప్రధానమైనది మన వైదిక సంస్కృతి. ఋగ్వేదంలో మొదటి మంత్రమే 'అగ్నిమీళే పురోహితం...' అని మొదలవుతుంది. అర్కైమ్ ప్రజలు కూడా అగ్నినే తమ ప్రధాన దైవంగా కొలిచేవారు.
పురావస్తు శాస్త్రవేత్తలు అక్కడ జంతువుల ఎముకలనూ, బూడిదనూ కనుగొన్నారు. ఇది మన అశ్వమేధ యాగం లేదా ఇతర క్రతువులను పోలి ఉంది. అంటే, 4000 ఏళ్ళ క్రితం రష్యా గడ్డపై 'స్వాహా' అనే మంత్రాలు ప్రతిధ్వనించి ఉంటాయా? అక్కడ దొరికిన కుండల మీద ఉన్న డిజైన్లకీ, మన వేద కాలం నాటి పాత్రలకీ చాలా దగ్గర పోలికలున్నాయి.
ప్రపంచ చరిత్రలో మొట్టమొదటిసారిగా యుద్ధ రథాలను (Chariots with spoked wheels) వాడింది ఎవరు? ఈ ప్రశ్నకు సమాధానం అర్కైమ్ పరిసర ప్రాంతాలలో దొరికింది. అక్కడ సమాధుల్లో గుర్రాలతో పాటు, రథాలను కూడా పూడ్చిపెట్టారు.
మహాభారత యుద్ధంలో రథాల ప్రాముఖ్యత మనకు తెలుసు. కృష్ణుడు అర్జునుడికి రథసారధిగా ఉన్నాడు. ఆ రథాల టెక్నాలజీ, ఆ జీవనశైలి, ఆ యుద్ధ తంత్రాలు... ఇవన్నీ అర్కైమ్ ప్రజలకు తెలుసు. అందుకే చరిత్రకారులు వీరిని 'సింతాష్టా సంస్కృతి' (Sintashta Culture) అని పిలుస్తారు. ఇది ఇండో-ఇరానియన్ లేదా ఆర్యన్ జాతికి చెందినదని నమ్ముతారు.
అర్కైమ్ గురించి, అక్కడ దొరికిన అగ్ని గుండాల గురించి విన్నాక... మనకు ఒక సందేహం కలగవచ్చు. 'అసలు మన ఋషులు, మన పూర్వీకులు, ఆ మంచు ప్రాంతాల్లో ఎందుకున్నారు? మనం ఉండేది ఉష్ణ మండలంలో కదా?' అని.
ఈ ప్రశ్నకు సమాధానం మన దేశ స్వాతంత్ర్య సమరయోధులూ, గొప్ప మేధావీ అయిన లోకమాన్య బాల గంగాధర్ తిలక్ గారు, వంద సంవత్సరాల క్రితమే ఇచ్చారు. ఆయన రాసిన సంచలనాత్మక పుస్తకం... 'The Arctic Home in the Vedas'.
తిలక్ గారు జైలులో ఉన్నప్పుడు ఋగ్వేదాన్ని క్షుణ్ణంగా పరిశీలించారు. అందులో వర్ణించిన కొన్ని ఖగోళ సంఘటనలు (Astronomical Events) చూసి, ఆయన ఆశ్చర్యపోయారు. వేదాలలో... సూర్యుడు ఉదయించడానికి ముందు ఉండే 'ఉషోదయం' (Dawn) చాలా సేపు, అంటే కొన్ని రోజుల పాటు కొనసాగుతుందని వర్ణించి ఉంది. అలాగే 6 నెలలు పగలు, 6 నెలలు రాత్రి ఉండే ప్రదేశాల గురించి ప్రస్తావన ఉంది.
భారతదేశంలో ఎక్కడా 6 నెలలు పగలు ఉండదు. సూర్యోదయం గంటల తరబడి సాగదు. ఇలాంటివి కేవలం ఉత్తర ధృవానికి దగ్గరగా ఉండే ఆర్కిటిక్ లేదా సైబీరియా, రష్యా ప్రాంతాలలోనే సాధ్యం. దీన్ని బట్టి, ఆర్యుల అసలు నివాసం ఉత్తర ధృవానికి దగ్గరగా ఉండే ప్రాంతమనీ, అక్కడి నుండే వారు వాతావరణ మార్పుల వల్ల క్రిందకు అంటే, దక్షిణ దిశగా వలస వచ్చారనీ సిద్ధాంతీకరించారు, తిలక్ గారు. రష్యాలో బయటపడ్డ ఈ అర్కైమ్ నగరం... తిలక్ గారి వాదనకు ఒక బలమైన సాక్ష్యంగా నిలుస్తోంది."
ఇక పురావస్తు శాస్త్రం (Archaeology) విషయానికి వస్తే... ఈ అర్కైమ్ నగరం ఒక్కటే కాదు. దీని వెనుక 'సింతాష్టా సంస్కృతి' (Sintashta Culture) అనే ఒక భారీ నాగరికత ఉంది. సామాన్య శక పూర్వం 2100 నుండి 1800 మధ్య కాలంలో... అంటే నేటికి సుమారుగా 4000 ఏళ్ళ క్రితం, దక్షిణ రష్యా మరియు ఉత్తర కజకిస్తాన్ ప్రాంతాల్లో ఈ సంస్కృతి వెల్లివిరిసింది.
సింతాష్టా ఎందుకు అంత ప్రత్యేకం? ఎందుకంటే, ప్రపంచానికి 'యుద్ధ రథాన్ని' (War Chariot) పరిచయం చేసింది వీరే!
అప్పటివరకు బండి చక్రాలు దిమ్మల్లాగా (Solid Wheels) ఉండేవి. కానీ, మొట్టమొదటిసారిగా చక్రానికి పుల్లలు (Spokes) పెట్టి, వేగంగా కదిలే రథాలను తయారు చేసింది సింతాష్టా ప్రజలే. ఆ రథాల మీద ఎక్కి వారు యుద్ధాలు చేసేవారు. మహాభారత కురుక్షేత్ర యుద్ధంలో వాడిన రథాల టెక్నాలజీకి మూలం ఇక్కడే ఉందంటే మీరు నమ్మగలరా?
అంతేకాదు, సింతాష్టా త్రవ్వకాలలో దొరికిన సమాధుల్లో... మనిషితో పాటు గుర్రాలను, రథాలను, ఆయుధాలను పాతిపెట్టేవారు. ఇది మన వైదిక సంస్కృతిలో రాజులు చేసే 'అశ్వమేధ యాగం' తాలూకు ఆచారాలను గుర్తుచేస్తోంది. గుర్రాన్ని బలి ఇవ్వడం లేదా పూజించడం అనేది వీరి సంస్కృతిలో ప్రధాన భాగం.
సింతాష్టా ప్రజలు లోహ విద్యలో (Metallurgy) ఆరితేరినవారు. రాగి (Copper) మరియు కంచు (Bronze) ఆయుధాలు తయారు చేయడంలో వీరు దిట్ట. మన పురాణాల్లో 'విశ్వకర్మ' లాంటి వారు ఆయుధాలు తయారు చేసినట్లు, వీరు ఆ కాలంలోనే అత్యంత శక్తివంతమైన ఆయుధాలను తయారు చేసేవారు.
భాషాపరంగా చూస్తే... వీరు మాట్లాడిన భాష 'ప్రోటో-ఇండో-ఇరానియన్' అనేది, సంస్కృతానికి దగ్గరి భాష. అందుకే అర్కైమ్ మరియు సింతాష్టా ప్రాంతాల్లో దొరికిన ఆధారాలు, నేరుగా సనాతన ధర్మానికీ, వేదాలకూ ముడిపడుతున్నాయి.
ఇక మిలియన్ డాలర్ ప్రశ్న, వీరు ఎవరు? అనేది. దీనికి రెండు వాదనలున్నాయి.
మొదటిది ఆర్యన్ ఇన్వేషన్ థియరీ (Aryan Invasion Theory): మధ్య ఆసియా అంటే రష్యా నుండి ఆర్యులు గుర్రాలపై వచ్చి భారత్లో స్థిరపడ్డారు, వారి వెంటే వేదాలు తెచ్చారనేది ఒక వాదన. అర్కైమ్ దానికి సాక్ష్యం అని పాశ్చాత్యులు అంటారు.
రెండవది, ఔట్ ఆఫ్ ఇండియా థియరీ (Out of India Theory): భారత్ నుండే ఒక సమూహం పశ్చిమ దిశగా వలస వెళ్ళింది. వారు తమతో పాటు వైదిక సంస్కృతినీ, అగ్ని ఆరాధననూ రష్యా, ఇరాన్, యూరప్ వరకు తీసుకెళ్ళారనేది, మరో బలమైన వాదన.
ఏది ఏమైనా, ఒకటి మాత్రం నిజం. నేటి భౌగోళిక సరిహద్దులు మన పూర్వీకులకు లేవు. సనాతన ధర్మం అనేది ఏదో ఒక చిన్న ప్రాంతానికి పరిమితమైనది కాదు. అది విశ్వజనీనం. అర్కైమ్ నగరం, బహుశా మన పూర్వీకులు వేసిన ఒక అడుగు జాడ కావచ్చు. ఆ అగ్ని గుండాల్లో వెలిగిన నిప్పు, మన వంట్లో ప్రవహించే రక్తంలో ఇంకా ఉష్ణాన్ని నింపుతూనే ఉంది.
కాలం గడిచేకొద్దీ నగరాలకు నగరాలు మట్టిలో కలిసిపోవచ్చు. గోడలు కూలిపోవచ్చు. కానీ సంస్కృతి అంత సులభంగా చెరిగిపోదు. రష్యాలోని ఆ మంచు పొరల కింద దాగి ఉన్న అర్కైమ్... మనకు ఒకటే చెబుతోంది. మన మూలాలు మనం అనుకున్నదానికంటే చాలా లోతైనవి. ఆదీ అంతం లేనిదే సనాతన ధర్మం..
ఈ వీడియో మీకు నచ్చితే, మన చరిత్రను, మన ధర్మాన్ని గౌరవించే ప్రతి ఒక్కరికీ షేర్ చేయండి. ఇలాంటి మరిన్ని ఆసక్తికరమైన విషయాల కోసం 'Voice of Maheedhar' చానెల్ ను సబ్స్క్రైబ్ చేసుకోండి.
జై హింద్! లోకా సమస్తా సుఖినో భవంతు..
